Barcelona ka arritur të shënojë fitore me rezultat 1-2 në takimin e zhvilluar të mërkurën mbrëma kundër Real Madridit në Santiago Bernabeu në supersfidën e parë çerekfinale të Kupës së Mbretit. Të parët që kaluan në epërsi ishin madrilenët, edhe pse Barcelona kishte dominim në posedimin e topit. Goli i parë erdhi në minutën e 11-të nga Cristiano Ronaldo ndërsa disa minuta më vonë Alexis Sanchez goditi traversën, por rezultati mbeti i pandryshuar. Në fillimin e pjesës së dytë (49’), kapiteni Carles Puyol arriti të shënojë pas një aksioni të organizuar mirë, 1-1. Në minutën e 77-të, Eric Abidal kaloi në epërsi Blaugranët pas një pasimi të Lionel Messit, 1-2. Ndeshja e kthimit do të zhvillohet pas një jave në Camp Nou, ku Barcelona do të presë Realin me avantazhin e ndeshjes së sotme.