Shaqiri e Xhaka me Baselin do të luajnë në finale të Kupës së Zvicrës, ndërkaq në FA Cup ndeshen Liverpooli dhe Chelsea. Serie A nuk i zhvilloi garat. Në Spanjë vazhdon beteja mes Real Madridit dhe Barcelonës. Në Gjermani, Dortmundi ka nisur përgatitjet për festë.Kampioni anglez, Manchester United këtë javë iu rikthye fitores ndaj skuadrës së Aston Villas, të cilën e mposhti me rezultat 4:0, për të ruajtur diferencën kundrejt Manchester Cityt. Sulmuesi më i spikatur anglez, Wayne Rooney i kaloi vendasit në epërsi nga pika e bardhë në minutën e 7-të, ndërsa pa përfunduar gjysma e parë (44’), Danny Welbeck e dyfishoi rezultatin. Rooney shënoi edhe golin e dytë personal (74’), ndërsa Luis Nani vendosi rezultatin përfundimtar të takimit në minutat shtesë. Kjo fitore e mban Manchester Unitedin pesë pikë larg rivalit Manchester City kur kanë mbetur edhe katër javë për t’u zhvilluar. Ndërkaq City këtë javë shfryu mllefin te skuadra e Norwichin, të cilën e mposht, 6:1. Në ishull ndeshje interesante u zhvilluan edhe në kuadër të FA, Kupës. Liverpooli një ditë më parë siguroi finalen kur mposhti Evertonin (2:1), derisa në Londër, Chelsea deklasoi në cilësinë e udhëtuesit skuadrën e Totenhamit, 5:1. Liverpooli tani do të mundohet të stoliste me trofeun e dytë pas triumfit në Challage Cup, por do ta ketë problem kundër skuadrës së uritur për sukses, Chelseas. Javën që e lamë pas edhe ne futbollin zviceran u përcaktuan skuadrat që kaluan në finale të Kupës së shtetit. Derisa në mesjavë Luzerni e kishte mposhtur Sionin (2:1), biletën për finale e siguroi edhe kampioni në fuqi, Baseli që mundi Winterthurin në shtëpi, 2:1. Për Baselin në gjysmëlojën e dytë u inkuadruan edhe mesfushorët shqiptar Xherdan Shaqiri e Granit Xhaka, ndërkaq për vendasit gjatë 90 minutave u paraqit Ermir Lenjani. Si në Angli edhe në La Ligën spanjolle po zhvillohet luftë interesante për titull, derisa taje konkurrojnë dy ekipe të një qyteti, në Spanjë lufta është në mes dy gjigantëve, Real Madridit dhe Barcelonës. Si njëra po ashtu edhe skuadra tjetër regjistruan fitoret e radhës, në ndërkohë që të dyja ia kishin nisur keq takimit duke pësuar gol. Madridasit para terrenit vendas mundën Sportingun, 3:1, ndërkaq Barcelona në udhëtim nuk e kishte të lehtë përballjen me Levanten. Kataluansit fituan falë dy golashit të Messit, por që goli i dytë i realizuar nga penalltia është kontestuar nga shumë akterë në Spanjë. Në Bundesligën gjermane tanimë rruga për titull ka marrë formën e prerë. Tri javë para përfundimit të edicionit, kampioni aktual, Borusia Dortmundit është shkëputur në tetë pikë nga përcjellësi, Bayern Munchen, që zhgënjeu me Mainzit duke u ndarë n paqe, derisa Dortmundi doli kokë lartë me Shalken në udhëtim, 2:1. Futbolli italian në vikend ishte shokuar nga vdekja e futbollistit 25 vjeçar të Piermario Morosini, anëtar i Livornos në Serie B. Ai kishte ndërruar jetë gjatë ndeshjes që e zhvilluan me Pescaren, ndërkaq për të nderuar atë federata italiane pezulloi të gjitha aktivitetet e sajë.
Te nderuar komentues! Duke mos dashur te cenojme opinionet tuaja, lutemi qe ato te mos permbajne fyerje dhe ofendime personale dhe te kene lidhje me shkrimin, apo temen per te cilen komentohet. Ne te kundert, nuk do te publikohen. Ju falenderojme qe na ndiqni dhe ju ftojme te vazhdoni te jeni pjese e Ks-Dardania. comments powered by Disqus